Спортови резултати

Почало ше футболске пренство у Сомборскей подручно лиги, у котрей з кулскей општини наступа шейсц клуби: Гайдук јуниор и Кула з Кули, Червенка, Младосц з Крушчича, Русин з Руского Крстура и Липар. Перше колє пренства означели два општински дерби. У першому, одограном у суботу у Червенки, новачок у Подручней лиги Червенка виграла од Младосци з Крушчича зоз 4:0. Зоз голями Малеша, Милоша и Йована Радмановичох и Керекеша вибраники тренера Милана Вуяковича уж у першой половини закончели роботу, а кед би у другей часци були вецей розиграни, победа могла буц и убедлївша. Друге општинске дерби одогране вчора у Липару, дзе ше стретли Липар и Гайдук јуниор з Кули. Стретнуток закончени нєришеним резултатом 1:1. Куляни свою лєпшу гру у першой половини окончили голом Давидовича. Але у другей часци Липар бул лєпши, а Ковач донєсол виривнанє, по чим мал и зицер за победу домацих. Кед ше все зобере, подзел бодох найлєпша реальна розвязка. Русин з Руского Крстура на гостованю у Товаришеве програл од Войводини зоз 4:1, гоч першу половину з голом Чизмара виришел у свою корист, а новачок у Подручней лиги Кула на гостованю у Бачкей Паланки програла од Старого граду зоз 3:0.

У наступнєй колу нови општински дерби: у Руским Крстуре ше стрета Русин и Црвенка, Хайдук юниор у Кули дочека Воєводину з Товаришева, Кула на Ґедеру будзе витать Крила Країни з Бачкей Паланки, Младосц у Крушчичу будзе домаїном екипи Будучносци з Младенова, а Липар идзе на гостї к Славиї до Пивницох.

Ђ. Боянич