Спортски микс

У першім коле ярней часци првенства у Другей футсал лїги Сербиї група Войводина Клуб малей копачкей бали Хайдук на гостованю у Темерину преграл од дружства ТеЕфКа з 3:1. Куляни су на тераз шеста на табели з 8 бодами, а у наступним коле пред своїма глядальцами дочекаю дружство Викинг з Руми.

Зачал ше пролеци дїл футболового шампионату у Сомборскей околишней лиги, у хторей змагаю ше пейц клуби з кулскей општини: Гайдук юниор з Кули, Русин з Русского Керестура, Младост з Крущичу, Липар и Полет з Сивца. Лєм футболисти Русина були успишни на пролеци премиєри. Керестурчани як гостє з голями Ороса и Катони з 2:1 перемогли дружину Крила Країни у Бачкей Паланки. Найвекше препачованє у першім колу була поразка футболистох Гайдука юниора. Куляни на своїм терену приявели дружину Стари град з Бачкей Паланки, котра заслужено, з 3:0 победала Кулянох и однесла бодзи. Липар на гостованю у Сомбору програл ЖАК-у з 1:0, Младост з Крущичу була у Бачком Брестовцу поражена од БСК-а з 2:0, а и сивацки Полет з 2:0 програл од Будучносци у Младенову. По тим колу Русин є штвари на таблици з 28, Гайдук юниор пети з 27, Младост дзесяти з 19, Липар тринаци з 18, а Полет предпоследнї, петнаци з 8 бодами. У наступним колу Русин у Руским Керестуре прийма Славию з Пивницох, Липар є домацин другопоставеному БСК-у з Бачкого Брестовца, Младост у Крущичу у сусїдским окршаю прийма Борац з Бачкого Грачаца, Полет є у Сивцу домацин Херцеговцу з Гайдобри, а Гайдук юниор идзе гостювати дружини Крила Країни у Бачку Паланку.

Светла точка у питаню першолигашкого рукомету є екипа Лаки з Црвенки, котра у 13. колу першенства записала и другу послїдовну яреню победу. Млади Црвенчанки у Мокрине победзели екипу Младост з Сербскей Црнї з 31:26, полчас 17:12. Найефективнєйша у редох екипи Лаки була Йована Йовович, котра постигла 10 ґоли. Рукометарки екипи Лаки су шосте на табели з 14 бодами, а у наступним колу витую екипу Словена з Руми.

У 13. колу прволигашкого рукометного првенства за мушки, у дербию водяца Кикинда у Црвенки победала другопоставену Црвенку з 29:27, полочас 14:11 за гостох и так найвироятнєйше уж обезпечела титулу шемпиона и поступ до Супер Б лиги. У дербию ше у першим полочасу грало углавном гол за гол, та у самим финишу першого часу рукометаши Црвенки зробели пару технїчних хибох, цо искусна екипа Кикинди покарала и на одпочинок пошла з трома голами предносци. Але, на початку другого часу млади рукометаши Црвенки у 35 минуту успели дошпивати до виривнаня, але потим настал пад, Кикинда знова одходзи на три голи предносци и рутински приводзи стрешенє концу. Найефикаснєйши у редох Црвенки бул Драгиша Рачић, котри досцигнул 8 голи. Наш другий представитель Сивац 69 у дербию задку як домаци у Црвенки програл ЖСК-у з Жабля з 28:23, хоч Сивчани перши час вирешели у свою корист з 16:14. Рошно отворели утриманє рукометаши Сивца и уж у 11 минуту мали седем голи предносци – вислїд бул 8:1. Ошамученого противнїка рукометаши Сивца зоз власнима хибами вратили до живота, гости лєм хасновали хиби Сивчанох и по полочасу зменшели на пристойни два голи заостатку. И кед у другим полочасу за 30 минут досцигнуто лєм седем голи, як то зробели рукометаши Сивца, поразка була неминова. Зоз тима поразку рукометаши Сивца ще вецей загрозели свою прволигашку позицию и пред нїма є грчовита борба за опстанок. Найефикаснєйши у редох Сивца бул Калич з 9 голами. По тим колу рукометаши Црвенки су други на табли з 19, а Сивац 69 є єднацати з 7 здобутима бодами. У насамнїм колу Црвенка идзе на гостованє до Срема у Сремску Митровицу, а Сивац гостує Ябуки.