Спортска хроника претеченого викенду

Футбалери Гайдука у предпослїдним колу првенства у Сербскей лїги, ґрупа Войводина, на гостованю у Старей Пазови победзели екипу Феникс з 3:1 и так заховали шанси же би обачували статус у сербскей лїги. Гайдучани повели голом младого Влайсавлєвича у 9. минути, а у финишу першого полочасу Матияшевич постигнул други гол за екипу з Кули и з предносцу двох голох на конту Гайдука екипи пошли на одпочинок. Кед Матияшевич у 64. минути привел Гайдук до преднощи 3:0, було ясне же бодове приходза до Кули. Екипа Феникса до конца шоречаня постигла почесни гол, так же дуел закончен з победу Гайдука 3:1. Футбалери Гайдука теркад тринадцати на таблици зоз 36 здобутих бодох. Теркашнє место на котрим ше находзи водзи Гайдук до нижшого ранґу змаганя, алє остало ещи єдно коло првенства котре да одвит чи Куляни и у наступуюцей сезони буду грац у Сербскей лїги. На жалосц, нє завиши вше лєм од нїх. Тотож, у остатнїм колу Гайдук пред своїма навиячами дочекує шампиона лїги, екипу Вршац, котру муши победзиц, а при тим директни ривал у бою за опстанок Раднички зоз Зренянина у остатнїм колу нє муши победзиц Кикинду у Кикинди.

Двациц и осме коло першенства у Сомборскей окружней лиги було нєуспешне за представительох з нашого обиску. Бацо того, три нашо тиме нє здобули анї гол. Футбалисти Црвенки, без сумнї, найприємнєйше препаченє весенскей часци першенства, на гостованю у Пригревици програли домашнїм, дружини Братства, з 5:0, полчас 3:0. Поразка нє чуди, бо Братство найквалитетнєйши состав у лиги, дружина котра уж давно обезпечела поступ до вишого ранґу, а же Црвенчани нє вступели до стреченя з превелїким значеньом, потвердзює факт же на лавки остали два стандартни првотимци, капитан Суботич и швиглїви Керекеш. Русин з Русского Керестура на гостованю у Гложану програл Будучносци з 2:0, полчас 1:0. З тим истим резултатом и Липар програл ЖАК-у у Сомбору. Липарчани уж у 28. минути остали з менєй гравцови, бо Живко бул виключени; одолевали цали годзину, аж домашнї боєву надмоц на терену закрунували голами здобутими у 60. и 74. минути. Русин шицей час на швертим месце у табели з 52 бодом, Црвенка є єдинаста з 36, а Липар тринадцяти з 33 бодами. У насампредуюцим колу Русин у Руским Керестуре витує дружину Полета з Каравукова, Црвенка дома витує дружину Наша звезда з Силбаша, а Липар пред своїма навивачами витує дружину Будучносци з Младенова.

З трох наших представнїкох у Сомборскей медзиопштинскей лиги перша класа лєм Младост з Крушчича записала победу. Крушчичани пред своїма навиячами против последнєй Граничара з Ридзице водзели з 6:0 кед стреченє прекинуте, бо екипа з Ридзице остала без достаточного числа грачох на терену. Пред прекинутям тройни стрелац за Младост бул Грдинич, а по гол дали Головати, Гачевич и Вукович. Два остатнї представнїки з кулскей общини були гости. Кула розчаровала, бо на гостованю у Бачком Брєгу од предпослєднього на табели Динама була поражена з 3:0, док Медзю Сивацки Полет у Стапару програл од ведущого Гайдука з 5:0. Кула шицкого часу штварта на табели з 45, Полет шести з 35, а Младост девета з 28 здобутих бодох. Заднє коло обелєжи општински дерби, бо у Сивцу ше стрета Полет и Младост з Крушчича, док Кула на Гедеру дочека оФК Оджаке.

Ручни клуб „Русин“ з Руского Керестура вчора бул домакином першого Медзинародного турнира у мини-руку. На смотри наймладших ручних и ручних чаривницох участвовало дванадцать дружтв, а медзинародни характер турниру дали своїм участвованьом два дружтва з Републики Хорвацкей, дружтва з Илока и Славонского Брода. Попри нїх, учашнїками турнира у мини-руку були дружтва „Колубара“ з Лазаревца, потим дружтва з Бачкого Моноштора, Бачкого Брестовца, Оджакох, Крушчица, Словен з Руми, црвенски клуб „Лаки“, Школа рука „Растиме“ з Нового Сада и, розуми ше, домакини — члени Ручного клуба „Русин“. Дружтво у мини-руку твора шицири гравчи и голман, а утримка трва дзесяц минути. Красоту граня рука показало вецей як стотину хлопцох и девочкох, и було праве задовольство видзиц, з якым запалом змагаю ше. И зато вшицки вони вигралї, та капитаном дружтв-учашнїкох на першому медзинародним турниру у мини-руку уручили пригодни плакети Ручного союзу Войводини, котри им предавали колишня репрезентантка Злата Паплацко и секретар Ручного союзу Войводини Иван Мандић.    

Ђ.Боянич