Рукометари Црвенки поражени у наставку першенства у АРКУС Суперлиги Србиї

Рукометари Црвенки су наставок першенства у АРКУС Суперлиги Србиї обелєжели з пораженєм. Наиме, у 12. колу першенства Црвенка приняла екипу Партизана з Беоґрада. Беоґрадчани здобули победу з резултатом 37:31, полчас 20:16 за Партизан. Сретнуце нє мало жадного такмичарского значаю, бо Партизан обезпечел место у плей-офу, док Црвенка будзе у плей-ауту, та ова сретнуца тренерови Црвенки Владимирови Зеякови послужела лєм як добра припремна утакмица за предстояцу сретнуцу з Пролетером у Зренянину. Найефикаснєйши у екипи Црвенки були Ивич и Савич з по пять постигнутих ґолох.

У 13. коле першенства у АРКУС Суперлиги Сербиї гандбалєри Црвенки гостюю у Зренянине, дзе буду мерици сили з Пролетером. Для «веверицох» то змаганє вельо значи, бо з можлївом победу до наступней фази змаганя пренєсли би 4 бода и так збешали би свої шанси у бою за опстанок у гандбаловей елити. Змаганє гандбалєрох Пролетера и Црвенки одограю у стреду у Зренянине.

Минули викенд футболски колективи хасновали на то, жеби через приятельски утакмици провирели, цо дотерали у припремним периодзе, алє з трьох заказаних одограна лєм єдна. Српсколигаш Гайдук у суботу у Липаре побидзел домашину, дружину Липара, члена Сомборскей медзиопштинскей лиги, перши разред, з 6:1, полчас 5:0. Кульчане су каждопадно квалитетнєйши склад, а к тому причину убедлївей победы треба глєдац и у факту же Гайдук зачал припреми 18. януара, кед Липар управо утакмицу з Гайдуком означел початок припремох. Двойни стрелєц за Гайдук у Липаре бул Бранислав Манойлович, а по голу дали Божович, Шушняр, Лачарак и Милош Манойлович, а гол за Липар дал Ковач. Футбалєри Гайдука буду мац наступну пробу спремности у стреду, кед у Кули буду гостиц дружину Младосц ГАТ з Нового Саду, а Липар буду наступну суботу гостем Искри у Куцури, а у недзелю буду дочековац дружину БСК-а з Бачкого Брестовца. През минули викенд були заказани ище дві утакмици. Войводянски лигаш Црвенка учера мала дочековац дружину Полєта з Сивца, алє зоз лєпим временским условиями змаганє одложене на 10. фебруар. Пред тим, Црвенка буду наступну недзелю играц утакмицу з дружину Младосци у Крушчичу. Подручни лигаш Русин учера мал у Руского Крстура дочековац дружину Будучносци з Савиного Села, алє змаганє нє було, бо домашни достали информациї же Савиноселци нє можу зобрац дружину. Футбалєри Русина буду мац наступну контролну утакмицу у недзелю, кед у Ловченцу буду мерици сили з Нєгошем.

Ђ.Боянич