Гандбалери з Црвенки знова на терену

Гандбалисти Црвенки по скоро двом месацом паузи врацили ше до тренажного процесу. Наиме, по одограних лєм трох колох пренства у весньовей часци, хтори пре пандемию корона вируса и заведженє ванредного станя були прекнути, а по укинуци ванредного станя услїдзело ришенє Управного одбору Гандбалского союза Сербиї о понишованю такмиченя. Но, Управни одбор Гандбалского союза принєсол ришенє о поширеню Супер А лиги, а же ше то поширенє одроби зоз баражом, у котрим би участвовали заинтерeсовани члени Супер Б лиги. Гандбалски клуб Црвенка заинтерeсовани за учасц у баражу, и то є причина, же тренира. Як поведа тренер гандбалистох Црвенки Владимир Зеяк, його вибрани гравци уж трецю недїлю зозєдно, а кед зачали з припремами, видзело ше же нєкотри з хлопцох треновали и у часу ванредного станя дома и пришли припремени, док други хлопци пришли доста запущени. Але до початку баража є доста часу, жебы надокнадзиц то, цо пропущене за веменя ванредного станя и неможлївосци ше зберац. Кед иде о баражу, у Гандбалским клубу Црвенка ше надяли, же Управни одбор Гандбалского союза Сербиї принєсе ришенє о поширеню Супер А лиги. Будуци же и у понишованей сезони мали найвиши амбициї — пласирац ше до Супер А лиги — они зачали припреми ще пред тим, як було принєшене ришенє о поширеню лиги, жебы утримки баража дочекали чим припремнєйши. Нєпознаница є то, же ше ище нє зна участнїкох баража. Пријави за учасц у баражу подаваю од 29. мая до 6. юния, по чим ше зна и число участнїкох, и датум одогранї утримкох. Ђ. Боянїч