Резултати трецого кола

У третєй коло прейґрунку у Српскей лиги ґрупа Войводина футболери Гайдука уписали першу поразу. На гостованю у Сремскей Митровици Гайдук 1912 поражени од домациньох Радничкого з 1:0. Куляни су актуално пейци на таблици з 6 здобутих бодох, а у наступним колу дочекаю екипу Раднички 1912 з Сомбора.

Нєуспишни були и футболєри Црвенки, котри у трецим колу првенства у Войводянскей лиги, ґрупа север, на гостованю у Бачкей Паланки програли домацому Крилу Країни з 3:0. Резултат найречовитше шведочи о тим, цо ше дїяло на терену. Црвенка тринайца на табели з єдним бодом, а у штвартим колу првенства пред своїма навиячами дочека екипу Текстилца з Оджацох.

У третїм колу првенства у Сомборскей окружней лиги фудбалери Русина у Руским Крстуре победзели дружтво Полета з Каравукова з 7:2. До убедлївей победи фудбалери Русина дошли аж у другей половини, бо першу чашу гри дружтво Полета закончело у свою корист з 1:0. Але у другей чаши три голи Бранковича, два Давидовича и по єден гол Филипа Вуйовича и искусного Джукановича принесли заслужени триумф фудбалером Русина, котри тераз седми на табели з 4 здобутима бодами, а у насамошнїм колу пойду на гостованє Гєрцеговцу до Гайдобри.

Третє коло першенства у Сомборскей медзиопштинскей лиги першого розряду означел општински дерби одограни у Сивцу, у котрим домаци Полет побидзел дружтво Младосц з Крушчица з 4:0. Побиду Полету зо два голї по два принесли икусни Радомир Ромич и Драган Медоєвич. Розчаровали футболєри Липара котри пред своїми навиячами були поражени од Партизана з Купусини з 2:1. Икусне дружтво гостиох використало свої дзве шанси, водзело з 2:0, а голом Новакова Липарчани лєм змиршели поразку. Наши штверти представителє у тим ступню змаганя, футболєри Кули, на гостованю у Србским Милетичу програли Задругару з 4:1. Почасни гол за Кулу забил млади Димитриє Шарац. Полет моментално третї на табели з 7 здобутих бодох, Кула осма з 4, кедз Липар єст єдинацти, а Младосц штирнацта з по 3 бодзе. У наступним колу на програму нови општински дерби: у Кули буду грац Кула и Липар, Полет у Сивцу будзе хосцовац Задругара з Србского Милетича, а Младосц у Крушчицу будзе хосцовац Єдинство з Рибарева.

Ђ.Боянич