Минули спортски викенд у знаку рукомету и баскетбалу

Минули спортски викенд бул у знаку рукомета и кошарки.

Гандбалисти Црвенки записали и десету поразу у першенству АРКУС Суперлиги Сербиї. Црвенчани на своїм терену програли Динаму з Панчева з 32:25, полочас 14:11 за гостох з Панчева. И пред тим дуелом було ясно же пред гандбалистами Црвенки є барз тяжка задача, бо им состав нєкомплетни, а на гостйованє им пришло дружство котре, попри Войводину, видза як кандидата за трофеї. И гандбалисти Динама оправдали ролю фаворита, заслужено славели. Як по обичайу, вибранїки Владимира Зеяка були у ровноправним положеню у першой половини до 23. минути, кед резултат глашел 10:9 за Динамо, а потим у наступних штирох минутох гости постигли штири, а храчи Црвенки нїєден гол, и в тот момент победнїк бул одлучени. Найефективнїши у рядах Црвенки бул пивот Каранович з 6 постигнутих голох. У наступним колу гандбалисти Црвенки идза на гостйованє до Кикинди.

Гандбалери Сивца, члени Супер Б лиги, нє вишлї на пласиранє до финалу Купу Войводини, бо вчера вечер у полуфиналним сусрете, котри ше одограл у Сивцу, препущели Пролетеру з Зренянина, членови АРКУС Суперлиги Сербиї з 41:34, полочас 21:13 за Пролетер. Од вислїдка 5:5 у седмей минуте гандбалери Пролетера у насцедуюцих штирох минутох зробели серию 5:0, преломели сусрет и потим з рутинну гиру обезпечели пласиранє до финалу Купу Войводини. Найефективнєйши у екипи Сивца були Чабаи з 12 и Беслаћ з 9 постигнутих голох. По вчерашнїм сусрете гандбалери Сивца одходза на одпочинок, а сезону буду наставиц у фебруари, кед ше будзе наставиц першенство у Супер Б лиги.

Потїшели кошаркаре Гайдука, котри у десятим колу першенства у Првей сербскей лиги на гостованю у Старей Пазови победзели екипу Омладинца з Нових Бановацох з 97:86, хоч домацини перше полувреме ришели у свою корист з 44:43. Гайдук у сусрету з Омладинцом настопел ослабени за капитена Шкрбича, котри є поранєни, а уж у пейтим минуту остали и без Шливанчанина, котрому зломели нос. Подля слов тренера Гайдука Данила Боровича, сусрет зломени у третей четвертини, котру кошаркари Гайдука виграли з 24:16. Найлєпши, а при тим и найефективнєйши у редох Гайдука бул Йоканович з 35 боди, Николай Лєшевич и Тешович дали по 15, Маринкович 12, а тота победа кошаркаром Гайдука значни витер у хрибет пред наступним сусретом, кед у Кули приймаю екипу Йокер з Сомбора, котра у дотерашньой часци сезони ма записани саму победи.

Ђ.Боянич