Одбойкаре Гайдука очековано виграли Ботафого з Нового Саду

Одбојкаре Гайдука, ведучу дружину на табели Першей войводянскей лиги, синоч у одложеней утримки 10. кола чемпіонату записали очековану вигру. У спортскей дворанї у Руским Керестуре одбојкаре Гайдука виграли дружину Ботафого з Нового Саду з 3:0. У дуелю лидера и послїднєй дружини одбојкаре Гайдука оправдали роль абсолютного фаворита, а о тим як доминовали свидеца резултати по сетох. У перших двох сетох одбојкаре Гайдука супарнїкови препущели лєм по 3 поени, а у трецим дружина Ботафого освоїла 11 поени. По десяцох колох чемпіонату одбојкаре Гайдука су перши на табели Першей войводянскей лиги з 26 здобутих бодох, а у насцедуюцим колу идзе до дружини Маглич 1953 у Магличу, котра є претпослїдна на табели, та можеме очековац нову убедлїву вигру одбојкарох Гайдука.

У продовженю шпортавого блоку шицко трохи вецей о кошаркарским клубу Гайдук. С розумним поводом, бо сениорска дружина виграла пласман до плей-офу, а на шляху успиху су и младши категориї того клубу. Теди, по чтирнацецох колох першенства у групи А Першей сербскей лиги кошаркаре Гайдука здобули дзесяц победох и штири програни и заняли треце место у групи, чим виграли пласман до плей-офу, у котрим буду пробовац добиц титул чемпиона и виграци пласман до вишого ранґу. Плей-оф почина у суботу, а у першим колу кошаркаре Гайдука приямаю Железничар з Инґиї. На шляху успиху су и младши категориї Гайдука. Генерация 2004. рочнїк виграла пласман медзи шест найкращих у Войводини, та буде у матчох з ровнїками новосадскей Войводини, Тамиша з Панчева, Пролетера з Зренянина, Спартака з Суботици и Врбаса пробовац виграци пласман на файнал-фор Сербиї. И дотерашнє остваренє, пласман медзи шест найкращих у Войводини, велїки успих, бо кошаркаре Гайдука наймладши и маю лєм шест гравцох 2004. рочнїка, а остали су 2006. и 2007. рочнїк. Кед ше дума о генерациї кошаркарох Гайдука 2002. рочнїка, дакле юниорскей дружини, у котрей ше треную младши првотимци и таким способом надополнюю недостаток минутох у сениорскей дружини, и та генерация Гайдука теперь длїли перше место з дружину Тамиша з Панчева, та у кошаркарским клубу Гайдук велїце задовольни же з обидвома младшими дружинами дошли до самого врха войводянского кошаркарства.

И на концу спортового блоку вест з футбалa. У рамикох припремох на ярни часц првенства у Войводянскей лиги футбалєре Црвенки вчора на свойим терену одмеряли сили з Искром з Куцури. Виграла Црвенка з 6:3, а голи дали Марко Керекеш и Бабич по два, и Божичич и Милан Суботич. Наступну пробу приправеносци футбалєре Црвенки буду мац у викендових дньох, кеди у такозваней генералней проби дочекую екипу Русина з Русского Керестура. Ярна часц првенства у Войводянскей лиги зачина 6. марца, а у першом колє Црвенка дочекує екипу Србобрана.        

Ђ.Боянич