Найава спортских подїйох у вихендових днях

Пред нами є занимлївши спортски викенд, а познача го гандбол, кошарка, одбойка и футбол.

Рукометари Сивца зачинаю пролецини похоц за бодами у першенству Супер Б лиги. Сивчани будз вечар, у утакмици 9. кола першенства гостовац у Бачкей Паланки, дзе одмера зоз сили з екипом Лавови. Реч є о стретнуци екипох зоз стредка таблици, а приваблївосц му дава факт же вечерашнї ривали щей лєм вишли зоз приправного периоду, та форма обидвох екипох нєпозната. Вечерашнє першенствене стретнуце Лавови – Сивац 69 у Бачкей Паланки зачне о 20 годзини и 30 минут.

Кошаркарє Гайдука у 13. колу першенства у Првей сербскей лиги дочекаю дружину Ај кам ту плей з Нового Саду. Куляни обезпечели пласман до ґрупи хтора будзе ше през плейоф надметовац за першакство, док гостї през плейаут буду глєдац за опстанок, та же бодзи з їхового медзисобного стреченя ше нє преноша. Но, тренер Гайдука Данило Борович истиче же од своїх вибраних будзе вимаговац максимално одвичну гру, и же шанцу достанє и младши храчи, жебы здобували искуство пред плејофом. Стреченє кошаркарох Гайдука и дружини Ај кам ту плей з Нового Саду будзе одогране завтра у сали Основней школи „Петефи бригада“, а зачне ше у 19 годзини.

Пред кошаркарями на терен у хали Основней школи „Петефи бригада“ вийду одбојкаре Гайдука. У 9. коле першенства у Првей войводянскей лиги одбојкаре Гайдука дочекаю екипу Клек Србијашуме 2 з Клека. То дерби кола, бо Гайдук други на табели з 20, а Клечани треци з 19 здобутих бодох. Але, вибраники тренера Милорада Лазича, осоколєни победу у минулым коле у гостох при ведущим Словану у Руми, найавюю же хасную предносц домашнього терену и запишу победу. Одбојкарски сусрет Гайдук – Клек Србијашуме 2 з Клека будзе завтра починац о 16 годзини и 30 минутох.

Приближуje ше марец, кеди и футболери пойду до першенственного ярного сезону, та викенди ше хасную за одограванє контролних утакмицох.

Србсколигаш Гайдук 1912 будзе завтра грац прияцельски стреченє з дружтвом Тиса у Адоряну. Одмераванє сили почне о 13 годзини.

Войводински лигаш Црвенка завтра одогра дружтвену стречу зо дружтвом Станишича. Дуел будзе одограни у Црвенки и почне у 14 годзини. Подля слов тренера Црвенки Милана Вуяковича, його вибраники по окршаю зо Станишичом уж у уторок буду грац з Искру з Куцури.

Подруйни лигаш Русин у нєдзелю у Руского Керестура дочека екипу Кули, члена Сомборскей медзиопштинскей лиги перши клас. Сусрет будзе починац о 13 годзини. У нєдзелю у Крушчићу приятельски сусрет одограю члени Сомборскей медзиопштинскей лиги перши клас, домацина Младосц и Липар. Наш штверти представнїк у Сомборскей медзиопштинскей лиги перши клас, екипа Полета з Сивца, у нєдзелю одогра контролни сусрет з Кордуном у Кляяичеву. Комшицки дуел будзе починац о 15 годзини.  

Ђ.Боянич