Установени Спортски центер општини Кула

Зда ше, же пришол конєц муком спортских клубох у кулскей општини, кед иде о одржованє спортских обєктох, котри хаснує за свої спортски активности. Наиме, Спортски центер „Црвенка“ з одлуку одборнїкох, принєшену на засиданю локалного парламента у уторок, преросол у Спортски центер општини Кула. Иде о институциї з обласи спорту, котрей ше повераю роботи управлєня, хаснованя и одржованя спортских обєктох и теренох, котри су у явней власносци локалней самоуправи и находза ше на териториї општини Кула. Овима одлуками обняти стадион „Милан Средановић“ з приспособеними обєктами, як и стадион на Гедеру у Кули, спортска сала „Слободан Чиле Мишковић“ у Црвенки, стадион „Милорад Џомба“ з приспособеними обєктами и помоцни стадион у Црвенки, стадион з приспособеними обєктами и спортска сала у Сивцу, та стадиони у Крушчићу и Рускім Крстуре з приспособеними обєктами. З тей одлуки нєобняти нєкотри спортски обєкти у кулскей општини, як спортска сала у Рускім Крстуре або футболски стадион у Липаре. На засидованю Скупштини општини повецене, же меновани спортски обєкти нє находза ше у явней власносци локалней самоуправи: конкретно, власнїк стадиона у Липаре є Спортске дружтво „Липар“, значи здруженє гражданох, та док тоти обєкти нє буду пренєшени до власносци локалней самоуправи, нєт законского основа за їх включованє до новоформованого Спортского центру општини Кула.

Новоформована установа и далєй роби як Спортски центер „Црвенка“ по зачаток хаснованя того ришеня, хторе ступа до моци осми дзень по обявеню у „Службеней газети општини Кула“, а будзе ше применйовац од 1. януара 2021. року. Зоз донесеним Ришеньом дефиноване же Управна рада установи муши розписац явни конкурс за менованє директора установи у року 60 дньох од дня ступаня до моци Статуту установи. Кажме и то же средства потребни за виконавок того ришеня буду обезпечени у буджету општини Кула за 2021. рок.