Спортски викенд: „Гайдук“ дочекує „Омладенац“, турнири у футболу под знаком питаня

Викенд котри є пред нами доноши нам нови виклики за футболни клуби з нашого општинства. Србсколигаш «Гайдук 1912» на стадийону «Милан Среданович» дочека екипу «Омладинац» з Нових Бановац. Меч ше гра у суботу, з початком о 17 годзини, а вступ є вольни. Понїж трьох бодох у Станишичу, приоритет за «билих» є победа и дальши победительни низ. Кед иде о наших подручних лигашох, «Липар» идзе на гостованє до «Будучносци» з Гложана, «Русин» на своїм терену дочека «Соко» з Новей Гайдобри, а «Црвенка» є домакином екипи «ЖАК» з Сомбора. «Липар» и «Русин» граю у нєдзелю, 21. августа, о 17 годзини, а «Црвенка» гра у суботу у тот сам час. Ушитки наши представительо у Меджуопштинскей лиги Сомбор – 1.разред граю у нєдзелю о 17 годзини. «Полет» з Сивца на своїм терену дочека «Задругар» з Србского Милетича, «Младост» з Крушчича гра дома проти екипи «Динамо 1923» з Бачкого Брега, а «Кула» идзе на гостованє до «Омладинаца» у Дероньох.

Турнир у малим футбалє „Горан Марчетић Мачак“ у Липару вступує до своєй завршнїци. Днеска вечар на програму полуфинални дуели: ММ Гвожђара Кула-Малина Црвенка и НТМ Чикерија Суботица-Ку медиа Кула. Перши матч зачина о 20 годзини, а други на програму о 21 годзини. Финале и матч за треце место ше буду грац у суботу, а у случаю злого часу розпоред ше преноши на єден дзень.

Што ше дотика турнира „Владислав Петровски“ у Кули, вчора одограни два матчи у юниорскей и штири матчи у сениорскей конкуренциї. Резултати у юниорох таке: Момци з краю-Мали четници 2:0 и Блок 13-Вукови 12:1. У сениорох, резултати таке: Дисконт пића Данило 2016-Молиментум 6:0, Савино Село-Ристрето 0:0, Спринклер Монт-Сплав Хавана 0:7 и Ел Капитано-Буразери 1:0. Што ше дотика наступного кола, у пяток граю, у юниорскей конкуренциї: Небески облаци-Куляни и Момци з краю-Вукови, а у сениорох на програму матчи: Кафе Бар Арваи-Кафаница Синђелић, Кафе Бар Арваи-Конект Електро Кула и Алпинистички радови Липар-Спринклер Монт. Як указали орґанизатори того турнира, и субота предвидзена за такмиченє, алє кед будзе падало дожч хтори є найавени, програма будзе одложена.

На купалїщу у Кули у суботу и недзелю одбудзе ше табор борєцкей вештини бразилски жиу-жицу. Предвидзени же буду два термини од 10 до 12 годзини и од 18 до 20 годзини, а тренованя буду водзиц тренери з тима „Цонстрицтор Јиу Јитсу“. Учашце у тим дводньовим таборе є бесплатне.

Ђ.Боянич