Спортски резултати минулого викенду

Гандбалїсти Сивца продовжели победну серию у Першей лїги, северна ґрупа. Сивац 69 у змаганю 18. кола першенства на гостованю у Мокрине победжел Црвену звезду з 34:31, по першой часци 17:14. Наперек тому, же змаганє одограли без тренера Бранка Жежеля, котри одсуствовал зоз приватних обовязкох, сивацки гандбалїсти предемонстровали свой квалитет и заслужено славели. Цали час контроловали игру и резултат, а домашнїком єдна-раз подарело ше вируньовац, и то у 23. минуте, кед резултат бул 14:14, а потим сивацки гандбалїсти зробели серию 3:0 и тих три голи предносци им подарело ше удержац до конца змаганя. Найефективнїши у екипи Сивца бул Чабаи, котри дал 11 голи. Сивац 69 и дальше други на таблици з 28 здобутих бодох, а у насампредуюцом колу пред своїма навиячами дочека Банатски Карловац.

Рукометари Црвенки су у 19. колу першенства у Супер Б лиги на гостованю у Лазаревцу програли ведучей Колубари з 34:22, полчас 17:9. Кед ше знає же на тот шпац к лидеру Црвенчани пошли лєм з девец гравцами, без голмана Неманї Рачича, искусних Джуровичох, Влади Рачича, Косовича, окрем убедлївого поразу нїч инше нє могло ше ожидац. Найефективнїши у екипи Црвенки бул Драгиша Рачич з 6 голами. Црвенка є девета на табели з 13 бодами, а у наступним колу прилапя београдски Синджелич.

У 18. коле прволигового рукометного шампионату за жени дружина Лаки з Црвенки у Оджакох грала нєрешено з дружиною Дероня – вислїдок 16:16. Гоч Црвенчанки перше полчас ришели у свою хаснь зо 10:8, домашнї рукометарки у другим полчасу преокренули вислїдок и у 48. минуту вишли до предношства зо 14:11. Але дружина Лаки ше нє предала и у 57. минуту з голом найефективнейшей Йовани Грабеж, котра постигла пейц голи, преходза до ведзеня зо 16:15, та рукометарки Дероня успели постигнуц гол и освоїц бод. Дружина Лаки тераз седма зо 17 бодами, а у насамшедшим коле идзе на гостйованє Радничкому до Баймока.

Футбалєри Оджака з Кули у 24. колє првенства у Сербскей лиги ґрупа Войводина на гостованю у Пригревици програли од другопоставеней екипи на таблїци „Братство  1946“ з 3:1. У лєм десяц минутох поганей гри вибраних Жельком Рачићом у периодзе од 32. до 43. минути екипа Братства дала три голи, а потом Матияшевич голом з пенала лєм змєкшал поражку. Екипа Оджака є дзесята на таблїци з 32 здобутима бодами, а у шлїдуюцим колє иде на гостованє к лидерoви таблїци, екипи „Бечеј 1918“ у Бечеј.

Двадзецет штверте коло шампионату у Сомборскей окружней лиги означели два комунални дерби. У першім, одограном на стадийону Милан Среданович у Кули, другопоставена Црвенка победзела Кулу зо 3:1, полчас 3:0. Црвенчани одограли одличне перше полчас и зо двома голами Милана Суботича и єдним голом Предрага Кишюхаса здобули недостижне предношство, котре з голом з пенала зменшал Желко Войнович. У другим комуналним дербию, одограним у Руского Крстуру, зостали ше дружини зоз задку таблици: претпослїднї Русин и послїднї Младосц з Крушчича. Русин славел зо 2:0, а до победи пришол на концу стрекованя голом Джукановича и автоголом Радака. Наш пейти представител Липар розочаровал, бо на своїм терену програл Геркулесови з Гайдобри зо 2:0. Црвенка друга на таблици зо 53 бодами, Липар дзесяти зо 24, Кула тринадцата зо 22, Русин штирнадцати зо 21, а Младосц послїдня, пятнадцата зо 8 бодами. У насамшедшим коле нови комунални дерби. У Руского Крстуру ше стретаю Русин и Кула, другопоставена Црвенка идзе на гостйованє Будучносци до Младенова, Младосц у Крушчичу витує Гайдук юниор, а Липар вольни.

Футбалери Полета з Сивца у 18. колу првенства Сомборскей медзиопштинскей лиги перши клас на гостованю у Бачком Моноштору победзели Дунав з 4:0. Полет є други на табели з 40 бодами, а у насампредшим колу дочека екипу Омладинца з Буковца.

Розчаровали футбалери Кулского футбалового клубу КФК-а. Куљани у 15. колу првенства Сомборскей медзиопштинскей лиги други клас, як гости програли послєднєпоставеней Телечки з 1:0, шицко тримаю пейте место на табели з 20 бодами и у насампредшим колу дочекаю Динамо з Сонти.

Минули викенд поразку забелєжели и футболистки Полета з Сивца, котри у 12. коле першенства првей лиги пред своїма навиячами програли Канїжи з 1:0. Футболистки Полета су седме на табели з 7 бодами, а у наступним коле идзу на гостованє к дружтву Лавице Дубочица до Лесковца.

По двох повязаних победох футсалери Гайдука у сушрете 19. кола првенства у Футсал лиги Войводини, пред своїма присталцами у Кули грали нєришено з Тису з Нового Бечея – резултат 4:4. Куляни водзели аж до тридец секунди пред концом, алє гостїм ше подарело вирівнац и здобуц бод. Голї за Гайдук дали Киш два, а Радович и Хусак по єден. Футсалери Гайдука девяти зоз 25 здобутими бодами, а у насамедшим колє пойду до Врбасу на мегдан екипи Лєцючі Голандез.

Ђ.Боянич