Спортски мозайк

Футбалерки „Полета“ зо Сивца победнїци Купу Войводини, бо у финалним змаганю одограном вчора у Сивцу побежели „Металманию“ зо Кањиже 4:1 и так третий раз по шлїде у свої витрини поставели победни пехар. Кед Анастасия Говорчин и Виктория Часар ґолами повели Сивчанки 2:0, було ясне хто здобуде Куп, а ґоли Николет Часар и Вујадиновичовей потовжем лєм дополнили шампионски утисак. На концу змаганя капетанки футбалеркох „Полета“ Йовани Зиндовић победни пехар, дар Футбалового союза Войводини, предал Чедомир Драшковић.

У 4. коле првенства у Сомборскей околицней лиги футболери Гайдук юниора забелєжели и штврту победу за шедом. Куľанє пред своїма навивачами перемагли Славию з Пивнїц з 4:0, алє треба буц реални и повесц и же мали щесце, бо при резултатє 0:0 гостє мали два велїкe шанси, котри нє виужили засягуюци файними интервенциями голмана Гайдук юниора Йовицe Калинича. Попри нїм у шорох Гайдук юниора вирознил ше тройни стрелац Душан Данойевич, а єден гол дал Давидович. Липар здобул бод бо на гостованю у Младенове з екипом Будучносци играл нєришено 0:0, а бод здобули и футболери сивацкого Полета, котри з Тереквешом у Свилойеве грали нєришено 1:1. Осталє наши два представнїки програли. Русин з Русского Крстура у Бачком Брестовце програл БСК-у з 2:1, а Младосц з Крушчича у Гайдобре од домацей Герцеговца програла з 4:0. По тотим коле Гайдук юниор дзели перше место з 12 бодами, Липар є пети з 7, Младосц дашета з 4, Полет єданадцати з 3, а Русин последний з єдним бодом. У насамочним коле на програми є општински дерби, бо у Сивцу ше зиду Полет и Гайдук юниор, Липар дочека екипу Герцеговца з Гайдобри, Русин є домаци Борацу з Бачкого Грачаца, а Младосц у Крушчичу дочека екипу Стари град з Бачкей Паланки.

У трецим колє шамионату у Сомборскей лїґи 1. класи Кула на гостованю у Ґакову зоз домацим Ґраничаром грала неришено 3:3, гоч домаци мали предносц од 3:0. Други наш представитель, футбалери Црвенки, на гостованю у Стапару програли од Гайдука зо 4:3. Кула водзи на табели зо 7 бодами, а Црвенка є третя зо 6. У наступним колє Кула дочека дружину Алекси Шантича, а Црвенка будзе хосцовац Омладинца з Деронєв.

Футбалери Кулского футбалового клуба КФК у трецим колє шамионату Сомборскей медзиопштинскей лїґи другей класи на гостованю у Сомборе з ОФК Металцом грали неришено 0:0 и зо 5 здобутих бодох моментално су пети на табели. У наступним колє КФК у Кули дочека водяци Партизан з Купусини.

Ђ. Боянич