Спортска панорама

Успишни були кегляри Гайдука, котри у 18. колу першенства у Першей войводянскей лиги пред своїма фанушками победзели дружтво Кляїчева зо 8:0 поентох, односно 3201:3012 зрушених кегльох. Найвреднєйши резултат у дружтве Гайдука здобул Владимир Тришич, котри зрушел 564 кегльох. Кегляри Гайдука су перши на таблици, а жеби там и остали, у наступним колу муша победзиц дружтво 13. май, котре их дочека у Новим Садзе.

Баскетболери Гайдука розчаровали своїх фанушикох, бо у стречу 18. кола змаганя у Першей србскей лиги, як домацини, програли предпослїдньому Крис кросу з Панчева з 92:88. Баскетболери Гайдука дуже лємно одограли першу половину стречи и допущели Панчевачох здобуц 20 бод предносци, бо перша половина окончела ше резултатом 50:30 за Крис крос. У другей часци баскетболери Гайдука почали грац лєпше, та нє змогли достигнуц тоту вельку предносц. Треба повесц и то же у тей стречи за екипу Гайдука нє настуали капетан Шкрбич и штандардни првотимец Борович. Баскетболери Гайдука по тей поразки девяти на таблици зо скором 8 победи и 10 поразки, а у насцедуюцим коле знова буду домацини, бо до нїх приходзи Єдинство з Нового Бечея.

У 18. колу чемпионату у Другей србскей лиги кошаркаре Сивца записали нове вигранє и так удержали першу позицию на табели. Сивчани на гостйованю у Зренянину виграли над дружтвом Петровграда зо 94:62. Кед ше виграє з розлику вецей як 30 бодох, ясне, же хто на терену ришовал. Наш други представитель, кошаркаре з Црвенки, як гости у дербию дружтвох зоз конца табели програли Войводини з Башайда зо 68:60 и так ше знова вернули на остатню позицию на табели. По тим колу Сивац ведзе з 16 виграньом и двома поразками, а Црвенка остатня з 2 виграньом и 16 поразками. У наступним колу Црвенка дочека Будучносц з Нового Саду, а Сивац идзе до Бечея на мегдан Тиси.

Гандбалисти з Црвенки у пролетнїм старту суперлигового чемпионату у суседским змаганю у Врбасу програли дружтву Врбас Петрол зо 30:27, полчас 15:9. Злосца вибраники Радосава Ковачевича отворели утриманє, домашнї Врбас Петрол уж у 11. минуту мал пейц голи предносц, кед резултат бул 6:1, та шицки напори Црвенчанох, же би у продовженю утриманя догнали предносц домашнїх, закончели ше лєм на нєуспишних покушаньох. Найефективнши у дружтве з Црвенки булї Йован Пеич-Тукуляц з 7, як и искусни Дюрович з 5 забитима голами. Црвенка тераз осма на табели з 9 бодами, а у наступним колу пред своїма прихильниками дочекає Мораву з Великей Планки.

Ђ.Боянич