„Русин“ у Джурджине за вишу рангу, скоро зачина турнир у Црвенки

У нєдзелю, 18 юния, зоз початком о 17:30 годзини, футбалски клуб „Русин“ гра перши барежни матч за пополнєня Войводинскей лиги. Ривал є тим „Дюрдьина“, а Керестурци позиваю вше прихильнїкох, котри можу, жебы пришли и подпрли их у тей велї важней утриманки. Олєгчуюца околносц то, же реванш утриманка ше гра у Руским Керестуре, та же кажди резултат окреме од поразки уєдно и повольни резултат.

Як ше и календарно приближује лїто, так зачинаю и турнири у малим футбалє. Ноцни турнир у малим футбалє „Црвенка 2023“ зачина 20. юна, а одограє ше на терену Среднєй стручней школи у Црвенки. Перша награда за сеньорох обноши 200 хиляди динари, а за остатни катеґориї обезпечени пехари, медалї и поєдинєчни награди. Котизация за сеньорох 12 хиляди динари, а за пионїрох од 2008. по 2010. годзища, младших пионїрох од 2011. по 2013. годзища и за початнїкох 2014. и 2015. годзища котизация иста и обноши шейсц хиляди динари. Приголошованя отворени до 19. юна и можу ше зробиц звонком на телефонски чисел: 062/254-518.

Тоту суботу Кула будзе домакин атлетского спектаклу, 14. по шлїду „Бегу приятельства“. Дїцки беги, од першого по осми розред, стартую у 17 годзини, а у 18 годзини стартую сеньори з бегами на пейц и 10 километри. Старт на площадку коло Пошти у Кули, на углу Крамеровей и Ленїновей улици. Организатори волаю вших любителёх спорту и здравого способу живота вообще, жебы пришли и збогачели тоту манифестацию, хтора утвердзела место општини Кула на атлетскей мапи Сербиї и реґиону.

Делибашич