Резултати спортового викенду

У Сивцу у суботу одограна ревиялна гандбалова утримка, у котрей сили одмерели Сивац 69, шампион Првей лиги Сербиї ґрупа север и репрезентация лиги. Пред початком стрета огранїзована свеченосц, на котрей гандбалером Сивца вручени медалї за здобуте перше место, а капита́нови дружтва Любомиру Вучиничу шампионски пехар. Дар Гандбалового союзу Войводини вручел Слободан Павловић, предсидатель Сполочносци Првей гандбаловей лиги. Особлїви признаня як найкориснєйши гравец Првей лиги, а и найлєпши стрилєц з 209 голами, достал член Сивца Марко Чабаи. Признаня му вручел Иван Мандић, помоцнїк за судийски питаня Сполочносци Првей лиги Сербиї. Наперек тому, же стрета була ревиялна, спомняйме и то, же репрезентация Првей лиги побила Сивац 69 з 38:35, а по стрете огранїзоване дружне друженє и так прославене пласированє сивацких гандбалерох до Супер Б гандбаловей лиги Сербиї.

Футбалски актуелносци

Футбалєри Гайдука у 33. колє првенства у Сербскей лиги ґрупа Войводина пред своїма навиячами победзели Раднички з Зренянина з 4:2. Роботу футбалєри Гайдука закончили у першым полочасу, котре виграли з 4:0, а тоту часц гри означал з трома забитыма голами млади нападатель Гайдука Владан Видакович, а медзи стрельцох записал ше и Крмар. Другу часц стречи запаметаме по тим, же за перши тим дебитовали млади Душан Слијпчевич и Михайло Божович, одрасли у футбаловей школи Гайдука. Футбалєри Гайдука су други на таблици з 61 здобитым бодом, а у остатнїм колє првенства поєду до Вршца.

Од своїх навиячох з победу ше до наступней сезони розлучели футболери Црвенки, котри у 29. колє пренства у Войводянскей лиги на своїм терену победзели дружтво Таванкута з 2:1, гоч гости перши полчас достали з 1:0. У другей часци найперво Филип Фачол виривнює, а у финишу стречи капитан Милан Суботич зоз своїм голом доноши победу Црвенки. Футболери Црвенки су шейсци на табели з 42 бодом, а у пошлїднїм колє идзу до Пачира дзе ше одмеря з дружтвом Бачкей.

Закончена првенствена сезона у Сомборскей обласней лїґи. У општинским дербию, одграном у Сивцу, Полет побидзел дружину Липара з 2:1, гоч Липарчани з голом Лалича перши полочас розришели у свою корист. Но, у другим дїлу Младен Плавшич забил два гола за дружину Полета и так продужел наду же Сивчани можу заховац статус обласного лїґаша. Кула на Гедеру побидзела Будућносц з Парага з 3:1. Два гола за Кулу забил Букеилович, а єден Полич. Русин з Руских Керестура на гостованю у Гайдобри програл Гергевца з 3:0. Русин закончил сезону на пейтим месцу на табели з 45 бодами, а нашо три остатнї обласни дружини страхую за свой статус. Полет є тринаци з 36, Кула штирнаци з 35, а Липар петнаци, предпоследнї з 30 зобрани бод, и їх статус зависи од того хто випадне зоз виших лїґох, алє и од баражу за пополнєня виших лїґох.

Ђ.Боянич