Прегляд спортового викенду

Кошаркаре Гайдука у 11. колє чемпионату у Првей регионалней лиги Сербиї, пред своїма прихильнїками у Кули, победзели екипу Футога з 72:62, полчас 41:32. Стретнуце нє мало такмичарски значай, бо бодзи ше нє преноша до другой фази такмиченя, кедзи Гайдук пойдзе до плей-офу, а Футог до плей-ауту, та тренер Гайдука Данило Борович хасновал дуел з Футожанами на одпочивок келько стандардних першотимцох: капитена Шкрбича, найвекшого по досвидзеню Байича, найефективнєйшого стрельца Джуровича и надежного Копривици, а шанцу дал гравцом, котри у дотерайшим ходзе сезони мали менєй минут на терену. Резултат показує, же млади кошаркаре Гайдука шанцу добре хасновали. Победа нє була под питаньом ани на єден момент, а були моменти, кед розлика була и плюс 20 за Гайдук. Найефективнєйши у редох Гайдука були Сувайджич з 16 и Тешович з 12 бодами. Кедзи дуел з Футожанами бул остатнї, котри кошаркаре Гайдука одограли того року, на одпочивок одходза з другого места на таблици и скором 9 побед и двох поразок.

Баскетбалїсти Сивца су у 11. колє чемпионату Другей регионалней лїґи на гостованю у Суботици препали од домашнїх Спартака з 99:54, полочас 56:29. Резултат найобачлївше гвари о тим, цо видзене на терену: убедлїва гра и убедлїве победа баскетбалїстох Спартака. Баскетбалїсти Сивца одходза на чемпионатну паузу з задньей позициї на табели, з скором єдней победи и седемох поразкох.

Одбоїкаре Гайдука у деветим коле пренства у Другей лиги на гостованю у Сремскей Митровици одграли добру утримку, котру програли од домацей дружтву Срем Итон зо 3:2 сетох. Перши сет здобули одбоїкаре Гайдука на роздїл зо 29:27, а потом домаци врацаю удар и здобуваю други сет зо 25;22. У трецим сете лєпша гра одбоїкарох Гайдука привела к здобутю сету зо 25:20 и ведущим зо 2:1. Но зда ше, же потом одбоїкаром Гайдука дошло сили, та Срем Итон здобува штврти сет зо 25:11, а потом и тай-брейк зо 15:10 и записує победу зо 3:2. Наприкос програши, Гайдук здобул єден бод, а радує вше лєпша форма цалого дружтва Гайдука, як и наврацанє дизача Марича. У наступним коле одбоїкаре Гайдука дочекаю дружтво Младосци з Бачкого Петровца, котре другопоставене на таблїци, и тим самим фаворит у предстоєцей дуели.

Одбойкарки Гайдука у деветим колу першенства у Првей войводянскей лиги як домацина були поражени од дружтва ЦВС Елбрако техноленд з Сомбора з 3:0 сетох. Одбойкарки Гайдука лєм у першім сете указали свою квалитету, алє нажалосц тот сет програли на розлику 28:26, по чим настало опущенє у грі, та Сомборчанки рутинирано виграю два наступни сети з по 25 :15. Одбойкарки Гайдука завршели полсезону з єдним виграшом и записанима трома бодами, а у клубу гваря же их чека вельо роботи и поту, жеби у другей часци першенства мали што указац.

Куглари Гайдука у остатнїм колу єшенього дзелу првенства у Першей войводянскей лиги як домацини у Врбасу победели дружтво Юнакович Пригревица з 6:2 бодами, односно 3173:3064 звалєними кеглями, а победа є тим значнєйша бо дружтву Гайдука донєсла и першу позицийу на таблици. Найвреднєйши резултати у победи кугларох Гайдука над Пригревицу остварели Бранко Вуксан, котри звалєл 561 кеглю, Марко Еракович з 532 и Мирко Бакич з 527 звалєних кеглї. Єшеньо дзело првенства куглари Гайдука окончили на першої позицийи на таблици з 14 бодами и бодовим розликом 53:35, а по 14 бодов маю и Кристал з Зренянина и Нови Елан з Србобрана, алє з гришним бодовим розликом. Друга часц кугларского првенства у Першей войводянскей лиги зачне ше 15. односно 16. януара наступней року.

Ђ.Боянич