Нова Црвенка скоро по перши раз достава обискови центер

Малїняци з Новей Црвенки скоро буду, першираз, моци ходзиц до забавища у своїм населєним месту. Дзякуюци средством Министерства и локалней самоуправи, простор у обєкту Основней школи будзе адаптовани, та дзеци буду мац можлївосц ходзиц на полоднївни побит, односно штириґодзински програм у мешаней ґрупи – од 3 року до єдного року пред ходзеньом до школи. Як поведа директорка Предшколскей установи „Бамби“, Снежана Булатович, тот будзе 12. обєкт у составу тей установи, котра з помоцу Општини Кула стално роботи на звекшованю капацитету. Дзеци з Новей Црвенки, котри нїґда нє мали можлївосц ходзиц до забавища у своїм месту, нарештє буду мац ту можлївосц, цо будзе значне улєгчаньом и за їх родичох: „Находзиме ше у просторе нашого будуцого нового забавища. То будзе 12. обєкт у составу Предшколскей установи „Бамби“ и першираз ґрупа будзе у Новей Црвенки. Дотераз дзеци у Новей Црвенки нїґда нє мали можлївосц ходзиц до забавища, а теперь буду мац можлївосц ходзиц на полоднївни побит, односно штириґодзински програм, и предвидзене же то будзе мешана ґрупа – од 3 року до єдного року пред ходзеньом до школи. Тот простор будзе обновени зо средствох призначених у рами компоненти два – инклузивне предшколске вихованє и образованє, котре у Републики Србиї одвива ше од 2019. року. У рами зменьох у предшколским вихованю тиж так глєда ше простори и средства за отваранє нових забавищох там дзе дзеци дотераз нє мали можлївосц ходзиц до забавища, або за розширйованє капацитетох. У складзе зо политиков ПУ „Бамби“ и Општини Кула, стално працуєме на звекшованю капацитету, та нам була то добре пришла можлївосц. Зо средствох Министерства обнови ше тот простор за єдну воспитну ґрупу, а потим зо средствох локалней самоуправи опремиме тот простор, подаме жадосц за верификацию и надземе ше же скоро приймеме перших учашнїкох и же дзеци буду мац можлївосц, вєдно зо своїма родичами, оцувствовац добродзия з побиту у предшколскей установи“. Простор будуцого забавища обишол и председатель Општини Кула, Дамян Милянич, котри повел же забавище у Новей Црвенки доведе до того же и школа будзе мац вецей школярьох, а уж од септембра до нєй буду записани два оддзелєня, цо вельо добра новина. Окрем розширйованя капацитетох и обєктох, розширює ше и кадер, та у току школского одпочиваня подписани 21 контракт за стално у ПУ „Бамби“: „За општину вельо важне же ше указує же нїєдно населєне место, та ани найменше як Нова Црвенка, нє забуто кед ше дїє о нових спортских теренох и игришкох, а тераз Нова Црвенка першираз будзе мац забавище. И нє лєм же ПУ „Бамби“ розширює ше з оглядом на капацитети и обєкти, алє и з оглядом на кадер – окрем уредзованя обєктох у току школского одпочиваня подписани 21 контракт за стално у ПУ „Бамби“. То роботнїки котри дотераз робели на одредзено, на тимчасово-периодичних роботох итд., то єст котри уж фактично виконювали роботу. То велька ствар за самих замешканих, алє и за установу котра достала вельке число роботнїкох. Обєкти и опрема важни сегмент, алє суштина то замешкани, предовшиц воспитателє котри нєсу цали образовни процес у предшколскей установи. Нє так давно отворене друге оддзелєнє у Крушчичу, розширени ясельки у Сивцу, з минималнима ресурсами розширени капацитет у Црвенки. Само по себе же тоти капацитети и дальше нє доста, то добра ствар, бо ше до забавищох записує все вецей дзеци. Тераз ше виготовює проектна документация и увойдзе ше до адаптациї и будованя забавища у Руским Крстуре, а гляда ше и ришеня за Кулу. У Новей Црвенки, у општинским обєкту у рами школи, адаптує ше простор и отворе ше забавище. Добра новина же у Новей Црвенки, дзе нє так давно були лєм два школяри, од того школского року буду два оддзелєня школярьох. Сигурно же фунґованє Предшколскей установи у Новей Црвенки приведзе до того же и школа будзе мац вецей школярьох, бо вельо дзеци зтоту записовали ше до школи у Црвенки, а тераз, кед буду мац цали програм, шицко будзе моц фунґовац и ту, цо добри новини“.