Хронїка спортового викенду

Завершена сезона у Србскей лиги, ґрупа Войводина. Футбалери Гайдука у остатним коле першенства пред своїма навиячами у Кули победзели екипу Вршца з 4:2, победу ше розлуцили з навиячами, алє та победа Пирова. Наприкос триумфу над новым членом Першей лиги, Гайдук, як ше видзи, випада з Србскей лиги, бо директни супернїк Гайдука у борби за опстанок, Раднички з Зренянина, победзел у Кикинди и так зберег статус србсколигаша. Поведзели смо «як ше видзи», бо уж почали кружиц повески же буду ше зливаць нєкотри клуби, нєкотри занїмац, цо би отворело врата за опстанок екипи Гайдука, алє тераз то лєм повески. Што ше тиче сусриту Гайдука и Вршца, Куляни, свесни же з победу задримаю шанси у борби за опстанок, ишли до сусриту мотивовани и з двома голами Матиашевича и по єдним голом Влаисавлевича и Радмановича дошли до победи.

Футбалери Гайдука закончили сезону у Србскей лїґи ґрупа Войводина на тринацтим месце на табели зоз 39 бодами. Знимок стреча Гайдук – ОФК Вршац на програму КУ телевизиї можеце позерац вечар од 20 годзини.

И наши представителї у Сомборскей подручней лїґи, Русин, Червенка и Липар, ше з победами розлущели од своїх фанушикох до наступней сезони. Русин у Руским Керестуре хосц ел дружтво Полета з Каравукова и фанушики мали нагоду наслажац ше, бо видзели аж седем голох. Русин виграл зоз 4:3, полчас 1:0. Кед футбалери Русина у 52. минути повели зоз 3:0, голами Малцака, Кулича и Саянковича виглядало, же питанє победнїка виришене, та у наступних пола годзини гостє успели зменшиц на 3:2, а у последней минути регуларней часци Будински дал штверти гол за Русин и так обезпечел победу. Червенка пред своїма фанушиками надграла Нашу гвизду зоз Силбаша, победзела зоз 3:0. Но, Червенчани дошли до победи аж у другим полчасу, бо перша часц закончена без голох. У 48. минути Радойца Йованович «отклучел» браву гостий, два минути познєйше Милан Суботич дава други гол за Червенку, а стреч заклучел третїм голом, котри у 80. минути дал Срджан Булатович. Наш треци представител Липар на своїм терену дочакал Будучносц з Младенова и славел победу зоз 2:0. У першей минути Ґаврило Попович привел Липар до водзства, а по пола годзини гри Александер Марчетич дал други гол, котри ше указал як окончних 2:0 за Липар. Пред остатнїм колом првенства Русин штверти на табели зоз 55, Червенка десета зоз 39, а Липар дванацти зоз 36 бодами. У остатнїм колу првенства Сомборскей подручней лїґи вецки три нашо дружтва гостую. Русин иде на гостованє до найнижше пласифікованого Радничкого у Сомбор, Червенка иде до Кляйичева на стреч з Кордуном, а Липар иде на гостованє до шампиона лїґи, дружтва Братства у Пригревици.

Закончело ше и првенство у Сомборскей медзиопштинскей лїґи перши клас. Последнє коло обелєжил општински дерби, хтори ше одограл у Сивцу и у хторим ше змагали домашнї Полет и Младосц з Крушчича. Полет победзел з 4:0, а голї дали Марко Варга, Перлич, Вукашинович и Митар Варга. Кула на Гедеру победзела ОФК Оджаки з 3:1, алє то було премало, же би Оджачаном преузела друге место и так ше преко баража покушала достац до вишого ранґа. Куляни водзели голами Бортника, Савича и Анджелковича 3:0, и им потребни бул ище єден гол, же би преузели другу позицию, бо на єшень у Оджацох програли з 5:1. Була шанса на то, алє потим єдну нєрозмислєносц голмана Кули Радуловича екипа ОФК Оджаки потаргнула голом, хтори знєсол екипу Кули, потим пришли два червени картони домашнїм гравцом Савичу и Бортнику и теди було ясне же з пожаданого резултату нє буде нїч. Кула закончела сезону на трецим месце на таблици з 48 бодами, Полет є пети з 38, а Младосц з Крушчича закончела на десетим месце з 28 бодами.

Ђ.Боянич